1997 eta 2010 urteetan jaiotakoak dira Z belaunaldikoak. Belaunaldi honetakoek ez dituzte markak kontsumitzen, aztertu egiten dituzte.
“Bajo la lupa de la Generación Z” Espainiar Marka foroak egindako azterketan horrelaxe adierazten da.
Ikerketa hau aztertu ondoren lau ondorio atera ditugu:
1. Komunikatzea ez da nahikoa: identitate argia izan behar dugu
Z belaunaldiak “nola” komunikatzen den “zer” komunikatzen den bezainbeste aztertzen du. Irudia, tonua, asmoa … Pertsonalitatea duten markak, zarata aterako duten markak izango dira.
2. Konfiantza ez da erosten, benetakotasunez eraikitzen da
Komunikazio gardena, balio errealen defentsa eta komunitateari aktiboki entzuteko gaitasuna izan behar ditugu.
Zintzotasuna aktibo estrategiko bihurtzen da: balioak irudikatzeak edo koherentziarik gabeko kausez jabetzeak ez du funtzionatzen, eta, gainera, aurka ere egin dezake.
3. Influencer-ak balidatzaileak dira, ez bozgorailuak
Konbentzitu baino gehiago, pertzepzioak balioztatzen dituzte eduki-sortzaileek gaur egun. Gazteen %60k uste du influencerrek benetan erabili beharko lituzketela gomendatzen dituzten produktuak. Edukiak egiazkoa, independentea eta zintzoa izan behar du, produktu babestua ematen badu, agur.
4. Etika, estetika baino lehenago
Zuzen jokatu, eta argi eta garbi kontatu. Marka konprometitua izatea ez da soilik lehiatzeko abantaila bat: eskakizun sozial bat da.
Ondorio moduan esan dezakegu Z belaunaldiak ez dituela marka perfektuak behar, marka zintzoak baizik. Agentzien erronka, gure bezeroen arima, koherentzia eta asmoarekin kontakizunak eraikitzen laguntzea da. Izan ere, gazteekin konektatzea ez da TikTok-en egotea; zerbait esan behar dugu…eta zerbait erakutsi.
